2016 оны 8 сарын 17
Рио-2016 Олимпийн наадамд оролцож буй дүрвэгч тамирчид гэж хэн бэ

Өнгөрсөн зунаас эхлэн дэлхий нийтийн анхаарлыг татаж эхэлсэн дүрвэгчдийн асуудал одоо ч хурц хэвээр байгаа. Африк болон Ойрхи Дорнодын олон сая дүрвэгчийн хэрхэх тухай тогтсон шийдвэрт хүрээгүй л байна.

 

Хүн төрөлхтний эв нэгдлийн бэлэг тэмдэг болсон Олимпийн наадамд дүрвэгчдийн баг хэмээх тодотголтой 10 тамирчин оролцож буй.

 

Олимпийн олон улсын хорооны ерөнхийлөгч Томас Бах тэдгээр дүрвэгч тамирчдын тухай хэлэхдээ – тэд бол дүрвэгчдэд цаашдын гэрэл гэгээ рүү тэмүүлэх итгэлийг өгч буй сонгогдсон тамирчид гэсэн юм.  Хэдий эх орноосоо аргагүйн эрхэнд дүрвэж, бэлтгэл хийх боломжоор хомс байсан  ч Олимпийн наадамд оролцож байгаа бахархалтай тамирчид юм. Тэдгээрийн ямар төрөлд оролцож байгаа хийгээд хэрхэн амжилт үзүүлсэн тухай товч танилцуулъя.

 

  1. Рами Анис- усанд сэлэлтийн тамирчин

 

Дайны хөлд нэрвэгдсэн Сири улсаас 2015 онд дүрвэсэн Рами Газар Дундын тэнгисээр дамжин Туркт ирж улмаар Белги хүрсэн бөгөөд усан сэлэлтийн төрлөөр оролцож байна.

Тэрбээр 100 метрийн усан сэлэлтийн чөлөөт төрөлд өрсөлдөж 54,25 секундэд барианд оржээ.

Рами Анис Олимпт оролцож буй сэтгэгдлээ хуваалцахдаа – Олимпийн наадамд өрсөлдөнө гэдэг бол үнэхээр гайхалтай. Би яг л сайхан зүүд зүүдэлж байгаа мэт санагдаж байна. Энэ зүүднээсээ сэрмээргүй байна хэмээн ярьжээ.

 

  1.  Йеч Пур Биел-хөнгөн атлетик

 

Дайны хөлөөс зугатаж дүрвэгчдийн хуаранд 10 жил амьдарч буй Йеч Пур Биел “мартагдсан” хэмээн нэрлэгдэж буй Өмнөд Судан улсын тамирчин юм.

Тэрбээр гүйлтийн спортоор хичээллээд жил гаруй болж байгаа хэдий ч амжилттай, өсч яваа тамирчин. Цаг агаарын хүндхэн нөхцөл амьдарч буй орчны нөлөө зэргээс үүдэн түүнд бэлтгэл хийх хангалттай талбай ч байдагггүй. Гэсэн хэдий ч тэрбээр Олимпийн наадамд оролцож буй зүтгэлтэй нэгэн билээ. Биел эрэгтэйчүүдийн 800 метрийн зайн уралдаанд оролцож 1:54,67 секундэд барианд орсон байна.

Спорт миний амьдралд итгэл найдварыг өгч байна. Надад алт мөнгөн медаль зүүх нь сонин бишээ. Дүрвэгчид ч гэсэн ямар нэгэн зүйлийг хийж бүтээж чаддаг юм шүү гэдгийг би дэлхий нийтэд харуулахыг зорьсон гэж Биел хэлсэн юм.

 

  1. Жеймс Чиенжик-хөнгөн атлетик

 

 

Эрэгтэйчүүдийн 400 метрийн гүйлтийн уралдаанд оролцсон Жеймс бол өсвөр насандаа хүүхэд-цэрэг хэмээн нэрлэгддэг цэрэгт хүчээр татах албанаас зугатаж эх нутаг Суданаас Кенья улсын дүрвэгсдийн хуаранд иржээ.

Тэрбээр 400 метрийн зайг 52,89 секундэд туулж барианд орсон байна. Олимпт оролцож буй түүний зорилго бол амжилт үзүүлж өөрийгөө хэн гэдгийг харуулж өөрийгөө батлах явдал гэж Жеймс ярьсан юм. Жеймс өөрөө бусдын тусламжийг авч өдий зэрэгтэй явж байгаа тул бусдад ч мөн адил боломжоороо туслахыг зорьдог байна.

 

  1. Пауло Амотун Локоро-хөнгөн атлетик

 

Гүйлтийн төрлөөр оролцож буй Локорог дүрвэгсдийн хуаранд ирэхэд өмсөх гутал ч олдоогүй гэдэг. Өмнөд Суданаас эцэг эхийн хамтаар дүрвэсэн Локоро Кенья улсыг зорих замдаа байгалийн хишиг жимс жимсгэнээр гол зогоож амь гарч байжээ. Тэрбээр 1500 метрийн зайн гүйлтийн төрөлд 12-р байрт орж, 4:03,96 секундын амжилттайгаар хагас финалыг өндөрлөжээ. Дэлхийн дээд амжилтыг эвдэж, алтан медаль авах чинхүү хүсэл зоригтой гэж Локоро өгүүлсэн юм.

 

  1. Анжелина Надай Лохалит-хөнгөн атлетик

 

Өмнөд Судан улсад дэгдсэн иргэний дайны улмаас зургаан настай балчир охин эцэг эхээсээ холбоо тасарсан гунигт түүхийн эзэн Анжелина бүсгүй өдгөө 21 настай. Тэрбээр тэмцээн уралдаандаа амжилт гаргаж, улмаар тамирчны карьер хөөж ар гэрийнхнийхээ амьдралд тус нэмэр болохыг хүсдэг гэнэ.  Тэрбээр 1500 метрийн саадтай гүйлтийн төрөлд 4:47,38 секундын амжилт үзүүлж, 14 байрт оржээ.

Олимпийн наадамд оролцож буйдаа үнэхээр баяртай байгаа Анжелинагийн хувьд дүрвэгсдийг бусадтай нэгэн адил хүн гэдгийг мэдрүүлэх нь гол зорилго нь байсан гэсэн бөгөөд Рио-2016 наадамд дүрвэгсдийн баг оролцож буйд талархаж буйгаа илэрхийлсэн юм.

 

  1. Рөүз Натике Локониен-хөнгөн атлетик

 

Төрөлхийн авьяастай тамирчин Рөүз бол өнгөрсөн жилээс л гүйлтийн гутал өмсч гүйж эхэлжээ. Тэрбээр дүрвэгсдийн хуаранд болсон тэмцээнд ямар ч бэлтгэлгүй оролцож хоёрдугаар байрын эзнээр шалгарсан юм. Хэрвээ 10 настайдаа гэрийнхэн нь түүнийг авч Өмнөд Суданаас дүрвээгүй бол тэд амь эрсдэх байсан гэж ярьдаг байна. Тэрбээр энэ сарын 17-д эмэгтэйчүүдийн 800 метрийн саадтай гүйлтийн төрөлд оролцох юм байна. Гэрийнхэндээ туслах нь миний гол зорилго. Биеэ засаад гэрээ зас гэдэг шиг бусад дүрвэгсдэд ч мөн туслахыг зорьж буйгаа Рөүз өгүүлсэн юм.

 

  1. Ёонас Кинде-марафон

 

2013 оноос хойш Люксембургт амьдарч буй Этиопийн тамирчин Ёонас эх нутгаа улс төрийн шалтгаанаар орхижээ. Тэрбээр энэ сарын 21-д эрэгтэйчүүдийн марафонд оролцоно.

Олимпийн хорооноос дүрвэгсдийг наадамд оролцуулах болсон нь бидний хувьд итгэмээргүй мэдээ байсан. Үнэхээр гайхалтай, надад төрж буй энэ мэдрэмжийг би үгээр хэлж чадахгүй байна хэмээн Ёонас хэлжээ.

 

  1. Ёоланде Мабика-жудо

 

Бүгд Найрамдах Ардчилсан Конго улсаас дүрвэж гурван жилийн өмнө Рио хотод ирж амьдарч байгаа Ёоланда балчир байхдаа эх нутгаасаа дүрвэсэн бөгөөд гэрийнхнээсээ холбоо тасарчээ. Тэрбээр бага байхдаа нүүлгэн шилжүүлсэн хүүхдүүдийн хуаранд байхдаа анх жудо бөхөөр хичээллэж эхэлжээ.

Тэрбээр 70 кг-д барилдаж буй бөгөөд эхний барилдаандаа Израйлийн Линда Болдертэй учраа таарчээ.

Жудо надад мөнгө, санхүүгийн эрх чөлөөг өгөөгүй. Жудо надад сэтгэлийн асар их хатуужлыг өгсөн хэмээжээ.

 

  1. Юусра Мардини-усанд сэлэлтийн тамирчин

 

Сириэс дүрвэж явсан 20 иргэнийг далайд живэхээс аварч чадсан гэдгээрээ олонд танигдаж байсан Юусра бүсгүй Олимпийн наадамд усанд сэлэлтийн төрлөөр оролцож байна. Тэрбээр эмэгтэйчүүдийн 100 метрийн хоёр ч төрөлд оролцжээ. Дүрвэгсэд гэдэг бол бусадтай л адил хүн. Бидэнд эх нутаг гэр бүл бүгд байсан. Бид дүрвэж явах замыг сайн дураараа сонгоогүй гэдгийг бусдад ойлгуулахыг хүсдэг хэмээн Юусра ярьсан юм.

 

  1. Пополо Мисенжа-жудо

 

Рио-2016 наадамд жудо бөхийн барилдаанд хоёр тамирчин оролцож буйн нэг нь Мисенжа билээ. Тэрбээр мөн Бүгд Найрамдах Ардчилсан Конго улсаас дүрвэн гарч 2013 онд Бразилд орогнол хүссэн байна.

Тэрбээр эхний барилдаандаа Энэтхэгийн бөхтэй таарч ялалт байгуулсан боловч Өмнөд Солонгосын бөхөд иппон үнэлгээгээр хожигджээ.

Мисенжа бага байхдаа салсан хоёр дүүтэйгээ уулзаж тэднийгээ тэврээд үнсэхийг хүсч байгаа талаар дурсан ярьжээ.

 

                                                                                                                       И.МӨНХЦЭНГЭЛ

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...