“Х Түц” хамтлагийн жүжигчин Д.Түвшинтөр, С.Тэмүүжин, Г.Нарансолонго нар шинэ хамтлаг байгуулж байгаа тухай мэдээлэл цацагдаад удаж байна. Тэгвэл энэхүү мэдээлэл өнөөдөр бодитой гэдэг нь батлагдлаа. “Х Түц” хамтлагаас өрх тусгаарлаад тун ч удаагүй байгаа Монголын тайзны урлагийн отгон продакшн “Эмоци” удахгүй анхны шоу жүжгээ толилуулахаар бэлтгэл ажилдаа ороод байна. 20 хүний бүрэлдэхүүнтэй тус хамтлагийн захирал нь жүжигчин Д.Түвшинтөр буюу Төөтөө, дэд захирал нь С.Тэмүүжин буюу Тэмка ажээ.

Шинэ хамтлагийн анхны тоглолтонд СТА Б.Баатархүү, жүжигчин, хөтлөгч Г.Анхбаяр, жүжигчин, бүжиг дэглээч Г.Ган-Очир, дуучин “Хатариш” Мино буюу Т.Номин, Ж.Мөнгөнсүх нарын уран бүтээлчид хамтран тоглож байгаа аж. Тоглолтын ерөнхий ивээн тэтгэгчээр “Mixx pizza”, ивээн тэтгэгчээр “Zaluu.com”, “Чансаа” дэлгүүр зэрэг байгууллагууд ажиллаж байна. “Монгол фильм групп”-ын студид чимэглэсэн тайзны засал чимэглэлээс нь харахад чамгүй хөрөнгө зарж, нэлээд суурьтай хөдөлж байгаа нь илт.

“Эмоци” продакшныхан анхны уран бүтээлдээ чин сэтгэлээсээ зүтгэл гарган ажиллаж байгаа нь байшин дотор гудамж, гэрлэн дохио, байшин барилга бүхий бэсрэг хот байгуулснаас харагдана. Байшин дотор босгосон хотод багтаж ядсан эмоцийг харахад үнэхээр бахдалтай сайхан байлаа. "Эмоци" продакшны залуусын уран бүтээлийн тайз болсон энэ бяцхан хотыг тэдний цэл залуу нас, цалгиж бялхсан авьяас билэг нь эрхгүй чимэх ажээ. Ингээд тайзны уран бүтээлд цахиур хагалахаар зэхээд буй отгон продакшны шоу жүжгийн бэлтгэл ажил дээрээс хийсэн фото сурвалжлагаа хүргэе. Тун удахгүй тус продакшны жүжигчид бидэнд албан ёсны ярилцлага өгөхөө амласныг дуулгахад таатай байна.

Сэтгүүлч Н.Цэлмэг

Гэрэл зурагчин Пүрэвсамбуу

Эх сурвалж: ZONE.MN - Хязгааргүй эрх чөлөө